កណ្ដាល៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានប្រកាសថានឹងលាលែងតំណែងជានាយករដ្ឋមន្ត្រីនៅថ្ងៃទី២២ ខែសីហាខាងមុខ ខណៈវេទិកាសាធារណកាលពីថ្ងៃទី៣ ខែសីហា ត្រូវបានសម្ដេចប្រកាសថាជាវេទិកាសាធារណៈចុងក្រោយរបស់សម្ដេចក្នុងនាមជានាយករដ្ឋមន្ត្រីហើយ។

សម្ដេចថ្លែងកាលពីថ្ងៃទី៣ ខែសីហា ក្នុងពិធីសម្ពោធដាក់ឱ្យប្រើប្រាស់ផ្លូវក្រវ៉ាត់រាជធានីភ្នំពេញទី៣ថា៖ «ថ្ងៃនេះអាចចាត់ទុកថាជាពេលវេលាចុងក្រោយដែលខ្ញុំនិយាយក្នុងនាមជានាយករដ្ឋមន្ត្រី»។

សម្ដេចតេជោបានលើកឡើងថាបើទោះបីជាសម្ដេចលែងជានាយករដ្ឋមន្ត្រីរបស់ប្រទេសកម្ពុជាក៏ដោយក៏សម្ដេចទៅកាន់កាន់តួនាទីថ្មីផងដែរដែលជាឧត្តមក្រុមប្រឹក្សាព្រះមហាក្សត្រ និងប្រធានព្រឹទ្ធិសភាក្នុងឆ្នាំ២០២៤។ ក្រោមការដឹកនាំជិត ៤០ឆ្នាំរបស់សម្ដេចបានធ្វើឱ្យពលរដ្ឋមានមនោសញ្ចេតនាជាច្រើន ដោយពួកគេនៅតែបង្ហាញក្ដីអាឡះអាល័យចំពោះបុរសខ្លាំងនៅកម្ពុជាម្នាក់នេះ។

អ្នកស្រី យឹម សារី ពលរដ្ឋរស់ក្នុងខេត្តកណ្ដាល៖ «ខ្ញុំនៅតែអាឡោះអាល័យគាត់! តែគាត់មិនទៅណាទេ គាត់នៅតែបម្រើយើងដដែលទៀត។ […] គាត់បានពលីស្វែងរកការរំដោះពួកយើង។ កាលនោះ (សម័យខ្មែរក្រហម) គេជម្លៀសខ្ញុំទៅពោធិ៍សាត់ ហើយបានកងទ័ពគាត់ទៅរំដោះបានយើងរស់ដល់សព្វថ្ងៃ»។

អ្នកស្រី ព្រហ្ម ទូច រស់នៅក្នុងខេត្តកណ្ដាល៖ «ខ្ញុំនៅអាល័យគាត់! ៤០ឆ្នាំជាងខ្ញុំទើបបានជួប។ ខ្ញុំថាហើយថាសម្ដេចគឺជាមនុស្សអច្ឆរិយៈជាមនុស្សដ៏អស្ចារ្យសម្រាប់កម្ពុជា»។

សម្ដេចតេជោ ហ៊ុន សែន បានក្លាយជានាយករដ្ឋមន្ត្រីកម្ពុជានៅថ្ងៃទី១៤ ខែមករា ឆ្នាំ១៩៨៥ គិតរហូតមកដល់ថ្ងៃទី២២ ខែសីហា ខាងមុខមានចំនួន ៣៨ឆ្នាំ ៧ខែ និង៨ថ្ងៃ គឺជានាយករដ្ឋមន្ត្រីដែលកាន់តំណែងយូរជាងគេបង្អស់មួយនៅលើពិភពលោក។ ពលរដ្ឋយល់ថាក្រោមការដឹកនាំសម្ដេចបាននាំមកនូវសន្ដិភាព ស្ថេរភាព និងការអភិវឌ្ឍន៍ ដែលបានធ្វើឱ្យគាត់ពេញចិត្តនិងនៅតែគាំទ្រ។

អ្នកស្រី ឈិត សាខន រស់នៅក្នុងខេត្តកណ្ដាល៖ «មានច្រើនណាស់ការចងចាំច្រើនណាស់ សាលារៀន ផ្លូវ និយាយរួមរចនាសម្ព័ន្ធមានទាំងអស់។ […] សម្ដេចដឹកនាំល្អគ្មានអ្នកណាដឹកនាំដូចសម្ដេចទេ! តាំងពីខ្ញុំកើតរហូតមកដល់ពេលនេះអាយុ ៦២ឆ្នាំហើយគ្មានអ្នកដឹកនាំណានាំឱ្យមានសន្ដិភាពដូចសម្ដេចទេ»។

សម្រាប់លោក មាស ចំរើន អាយុ ៣៧ឆ្នាំ គ្រូបង្រៀននៅវិទ្យាល័យជ័វរ្ម័នទី៧ថា៖ «សម្រាប់ខ្ញុំៗគិតថាយើងចេញពីបាតដៃទទេ (រហូតមានការអភិវឌ្ឍន៍ដល់ពេលនេះ) គឺវាល្អហើយ តែបើខ្ញុំយើងធ្លាប់ទីសាំងហ្គាពួរទីអីអ៊ីចឹងយើងឃើញថារយៈពេលនៃការអភិវឌ្ឍន៍របស់ប្រទេសគេមានកម្រិតប៉ុន្ដែយើងពិបាកថាណាស់ដូចសាំងហ្គាពួរអីគាត់ទោះបីមិនឆ្លងកាត់សង្គ្រាមយ៉ាងណាក៏ដោយតែគាត់មានចំណតកំពង់ផែធំអ៊ីចឹងបើនិយាយពីការអភិវឌ្ឍនៅយើងយឺតជាងគេហើយក៏ប៉ុន្ដែឱកាសរបស់យើងក៏តិចជាងគេដែរ»។

ទោះជាមានការអាឡោះអាល័យក្ដីតែពលរដ្ឋបានបង្ហាញនូវជំនឿចិត្តលើការសម្រេចរបស់សម្ដេចតេជោក្នុងការបន្តវេនទៅមនុស្សជំនាន់ក្រោយ។

អ្នកស្រី យឹម សារី៖ «លោកកំសត់ណាស់ទំរាំបានមកប៉ុណ្ណេះ ខ្ញុំក៏បានឆ្លងកាត់ជំនាន់ ប៉ុល ពត ដូចគាត់ដែរ ទាំរាំគាត់បានធ្វើឱ្យបានប៉ុណ្ណេះខ្ញុំសប្បាយចិត្ត។ ហើយកូនគាត់ឡើងតំណែងជំនួសក៏ខ្ញុំសប្បាយចិត្តដែរ»។

លោក មាស ចំរើន៖ «ខ្ញុំគិតថាវាមិនជាបញ្ហាអីទេ! ដូចដែលសម្ដេចលើកឡើងចឹងបើទោះបីជាសម្ដេចមិនធ្វើនាយករដ្ឋមន្ត្រីក៏ដោយក៏សម្ដេចមិនបោះបង់ចោលដែរព្រោះគាត់នៅជាប្រធានបក្សដដែលទេ។ អ៊ីចឹងយើងអាចនិយាយបានថាគាត់នៅតែត្រួតត្រាយ នៅពីក្រោយខ្នងជួយទៅលើអ្នកដឹកនាំថ្មីជានិច្ច»។

អ្នកស្រី ព្រហ្ម ទូច៖ «អរគុណឱ្យសម្ដេច សូមឱ្យសម្ដេចអាយុវែង ជាម្លប់របស់កូនចៅតរៀងទៅមុខ។ ទាល់តែខ្ញុំចប់ជីវិតក៏ខ្ញុំនៅតែស្មោះជាមួយសម្ដេចរហូត»៕